Jóla"veiði"saga

Þá líður óðum að því að jólahátíðin gangi í garð. Þegar þetta er ritað er klukkan rétt að verða fimm og aðeins klukkutími þar til kirkjuklukkur hringja jólin inn. Af því tilefni langaði mig til að deila með ykkur lítilli jóla"veiði"sögu sem tengist flestum þeim sem í Veiðifélaginu eru á einn eða annan hátt.

Þannig er að afi minn, Sigga, Snæbjörns og Þrastar og tengdaafi Konráðs og Þóris (sem sagt maður sem kemur Þorvaldi ekkert við) og amma, Lárus Kirstinn Hinriksson og Guðný Sigríður Hjálmarsdóttir bjuggu á Akureyri um nokkurt skeið en afi er ættaður frá Reiðarfirði og amma frá Húsavík. Þau bjuggu sem sagt um hríð á Akureyri og þar var afi bifreiðastjóri og amma verkakona.

Amma sagði mér eitt sinn frá því að þau hefði haldið gæsir við heimili sitt og á hverju ári valdi amma tvær gæsir sem hún aldi sérstaklega til slátrunar á jólum. Hún þurfti þó aðeins eina gæs fyrir sig og sitt fólk, en ævinlega aldi hún aðra gæs því hún vissi að þegar nær dró jólum kom einhver og stal af henni gæs til að hafa á sínu jólaborði. Aðspurð sagðist hún vita hvaða maður það var sem nappaði gæsinni ár hvert en sá átti tæplega til hnífs og skeiðar fyrir sig og sína og bjó í næsta nágrenni við þau. Amma sagðist aldrei hafa séð eftir gæsinni ofaní umrædda fjölskyldu en hún hefði gjarnan viljað gefa hana um hver jól. Hins vegar var húsbóndinn á því heimili of stoltur til þess að fara að beiðast matar og því hafi þau amma haft þegjandi samkomulag um að hún aldi gæsina fyrir hann og átti síðan von á því að henni yrði stolið í aðdraganda jólanna.

Þessi saga er mér afar kær og mér verður oft hugsað til ömmu þegar ég fæ jólaöndina um hver jól. Mér var þó sérstaklega hugsað til hennar nú um þessi jól því við Sigrún systir mín (eiginkona Þóris) vitjuðum leiðis þeirra afa og ömmu í morgun í Fossvogskirkjugarði. Það var ósköp notaleg stund þarna við leiðið þeirra og Valgeirs litla og mátti ég til að blikka til afa þegar ég gerði krossmark við leiðið hans og brosa blítt til ömmu. 

Enn og aftur gleðileg jól kæru Veiðifélagar. Farið varlega um jólin og njótið samvistanna við fjölskyldur ykkar.  GLEÐILEG JÓL!

Framkvæmdastjórinn