Veiðifélagið kætist í ótíðinni

Veiðifélagið kætist óneitanlega í ótíðinni. Nú er tíminn til að vera inni og dytta að hinu og þessu, nú eða undirbúa stórafmæli sem verður snemma næsta ár. Heyrst hefur að undirbúningurinn hafi allt að því farið úr böndunum og að búið sé að bóka einhverja fræga tónlistarmenn í veisluna.

Það er ekki eins og gildir limir veiðifélagsins hafi verið að veiða sér til matar undanfarið, hvað þá heldur til svartrar sölu. Ekki einu sinni hafa menn dregist á fjöll til að leita rjúpna eða gæsar. Makalaus leti hefur blasað við veiðimönnum og jafnvel hafa einhverjir lagst niður við kvótasölu bara til þess að geta sagt að þeir hafi verið í fiski!  Ótrúleg frammistaða og meira að segja drykkja veiðifélagslima hefur dregist saman um 16,7% (sem er áfengismagnið í lélegu brasilísku púrtvíni).

Framundan er stórhátíð og hyggja veiðifélagslimir sér gott til glóðarinnar í mat og drykk, þó líklega verði villibráð ekki á borðum að þessu sinni.

Athugasemdir

[Snæbjörn Ólafsson (IP-tala skráð) 17.12.2007 kl. 11:31]

Halló halló.

Þó letin sé búin að vera mikil upp á síðkastið var hugsað fyrir stórhátíðunum í haust og verður  snæddur grafinn lax að hætti Ingibjargar Sigurðardóttur á aðfangadag.

[Vignir Arnarson, 18.12.2007 kl. 11:21]

Ætlið þið að seigja mér að villibráð sé ekki á borðum um hátíðirnar,það verða sko grillaðar gæsabringur á gamlárskvöld hjá mér skotnar á skeiðunum 18 ok kl 07,43

[Ingibjörg Hinriksdóttir, 19.12.2007 kl. 00:03]

Sæll Snæbjörn,

auðvitað verður grafinn lax að hætti múttu á aðfangadag en ekki hvað! En þú mátt ekki gleyma því að þú ert ekki eini limur Veiðifélagsins, þó þú sért e.t.v. sá eini sem veiðir eitthvað af viti og hugsar jafnvel eitthvað fram í tímann! Ég skrifa þetta í trausti þess að aðrir limir Veiðifélagsins lesi ekki síðuna né spjallið ... annars verð ég umsvifalaust rekin úr starfi!

Ég geri ráð fyrir því að á borðum hjá kokkinum verði önd sem er upprunnin á okkar fornu heimaslóð í Frakklandi og örugglega einhvert framandi kvikindi í forrétt, kæmi ekki á óvart að sjá þar skógardúfu eða fasana! Þegar ég bauðst til að redda ístertu í eftirrétt þverneitaði kokkurinn og heimtaði að sjá um þetta sjálfur. Geri ráð fyrir því að hann baki súkkulaðiköku eins og honum einum er lagið!

Sjáumst síðar ... knús!